بابک آدلی دایانیشما
بابک بوگون بیر آد دگیل
یوز ایللری آشیب گلن
عصیرلره یئنیلمه ین
قهرمانلیق دستانیدیر
ده ده قورقود ائللرینین
ایگیرد اوغلان قوچ قیزلارین
اوزانلرین ، قوپوزلارین
کیملیگینین کئشیگینده
یئلمازلارین
وارلیغینین عنوانیدیر
بابک آدلی دایانیشما
گله جگه آرخا دوران
قورتولوشا کؤرپو اولان
کؤنوللرده سارای سالان
چنلی بئلده دولت قوران
ملتیمین فرمانیدیر.
داغ داغ دردی داغا دؤنن
دؤنه دؤنه درده دؤزن
گؤزگو کیمی بوز گؤل ایلن
دینج گؤرونن
ساوالانین وولکانیدیر
ائلی دوستاق
دیلی یاساق
آنلی آچیق ، ایگیرد قوچاق
ترک ائلیمین سهندیدیر سلطانیدیر.
بذ قالاسی
داش قایالاردان اولوشان
بولودلارا سینه گرن
زیروه ده بیر قالا دگیل
کئچمیشیمین ، وارلیغیمین
اؤلمز ، سؤنمز چراغیدیر
قودوز قودورقان یادلارا
قارشی گلن قدرتیمین اوجاغیدیر
ظولمه زورا خیانته
گئریلیگه جهالته
باش ایمه ین
سئوگیمیزین اوردوسودور
گووه نیدیر دایاغیدیر
بابک بوگون بیر آد دگیل
آرزولارلا ییرقالانان
اوره کلرده دالغالانان
آذربایجان ملتینین بایراغیدیر
اسماعیل جمیلی
