آیدین فیکیر اویونا گلمز ، اویون یارادار
آذتورک
سئچیملردن سونرا ؛ بللی سونوج ، یالنیش تحلیل لر
ایران ایسلام جومهورییتینین ، اونونجو جومهورباشقان سئچیم لری ، گئچمیش سئچیم لره گؤره فرقلی اولسادا ، همان سونوج لارلا باشا چاتدی و یئنه حاکئمییت اؤز ایسته دیغی نتیجه نی ، اله گتیره رک ، بیعت لشمه مراسیم لرینی بیتیردی.
بو آرادا بیز و بیزیم میللی حرکتیمیز بیر سیرا آراشدیرمالارلا بو اولایی قارشیلادی. سئچیم لردن اؤنجه اؤنری لر ، یازی لار و تحلیل لر بیر سیرا چیخارلار و منفعت لر اساسیندا اولاراق، سئچیم لرده جناب اکبر اعلمی دن حیمایت ائتمک تکلیف ایله میللتیمیزین اؤنونده حاضیر اولدوق. البتده باشقا تکلیف لر ده اولموش ، آما چوخ فرقلی و سؤز یئری اولان و دیرلندیرمه لی اؤنری بو اولموش و جناب گونتای قارداشیمیز ، بو اؤنری نی چوخ گؤزل آچیقلامیش لار. یازار اؤزو تحریم اؤنری سینین طرفداری اولاراق، جناب گونتای قارداشیمیزین سؤزلری نی قبول ائده رک ، بو اؤنری ده آزدان چوخدان یارار گؤردو. آما ایران حکومتی بو فورصتی بیزدن آلاراق و جناب اعلمی یه صلاحییت وئرمه مزلیک ایله، بو بالاجا یاراری دا بیزه چاتدیرمادی. حاکمییتین بو رفتاریندان سونرا - بونو بیله رک کی اگر جناب اعلمی یه صلاحیت وئریلسه ایدی ، آذربایجانین اویونو قازانا بیلردی – بیزیم رفتاریمیز بو سئچیم لره گؤره باشقا طور اولمالی ایدی. بیز داها بیر باشقا آدای دالیسیجا گئتمه مه لی ایدیک. و تحریم سیلاحیمیزدان یارارلانا بیلردیک.
آما تاسسوف لا بیزیم بیر سیرا ، فعال لاریمیز آیدینجاسینا تحریم سؤزون آرایا گتیرمه دیلر. و سس سیزلیک پئشه توتدولار و آرادا بیر سیرا فورصت طلب و میللی حرکتیمیزین چیخارلاری نی دوشونموین اینسان لار ، مئیدانا گیریب و باشقا آدای لار نفعینه تبلیغات ائتدی لر. میللی حرکتین فعال لاری نین اکثریتی نین سس سیزلیگی و مئیدان دان چیخماسی ، میللتیمیزی چاره سیز بوراخیب و اونلار اؤزلری بیر سیرا یالنیش فیکیرلر اساسیندا ، صاندیق باشینا گئدیب و حاکئمییتین ایسته دیغی نی یئرینه گتیردیلر. ایندیسه بیز اؤزوموزو آلداتمالی ییق ، آذربایجان دا بو سئچیم لرده ، ایرانین باشقا اؤلکه لری کیمین چوخلی فایزدا شیرکت ائتدی.
هر حالدا سئچیم لردن سونرا ، باش وئرن اولای لار داها ایلگینج اولدو و یئنه بیر سیرا دوستلاریمیزین وئردیغی آنالیزلر بو آرادا ، یئنه بیزی تعججوبلاندیردی. بیر سیرا یالنیش آنالیزلر ، میللتی بیزه گولدوره جک و بئله بیر آنالیزلر مئدیادا یایینلانمالی دیر. اؤرنک اوچون تورکییه ده یاشییان بیر عزیز دوستوموز بو اولایلاری ، عسگر – موللا ساواشی آدلاندیردی و اونا گؤره بیر سیرا تحلیل لر بیان ائتدی. بئله بیر یالنیش تحلیل لر ، بیزی یالنیش یول سئچمک ایله سونوج لاندیراجاک. ایران داکی وضعیت دن و حاکئمییتین ساختاریندان بیر آز خبری اولان دا بیلیر کی بو اولایلاردا عسگر - موللا ساواشی یوخ ایدی. اگر بئش اون دنه موللا ، اعتیراض چی لاردان حیمایت ائتدی و بیر سیرا نفوذلی و قودرتلی موللالاردا ، اعتیراض چی لارین آرخاسیندا اولسایدی ، او بیر طرف ده چوخ موللالار دا وار ایدی لار اعتیراض چی لارین اؤنونده دایاندیلار و اونلارین علیهینه چالیشدیلار. گؤره سن رفسنجانی ، منتظری ، صانعی و ... لر موللا ایدیلار ، آما احمد جننتی ، احمد خاتمی ، نوری همدانی ، مکارم شیرازی و یئددی سگگیز موجتهید کی بیانیه وئردیلر و اعتیراض چی لاری محکوم ائتدی لر ، موللا دئییلدیلر؟!
بو گؤستریر ویریلمیش تحلیل نه قدر یالنیش دیر و بونلاری ائشیدن میللت داها بیزه بئله سؤزلر اوچون گووه نمز. او زامان کی میللت گؤرور بیز بیر ساده اولایی ، دوز گون تحلیل ائیلیه بیلمیریک ، باشقا بیر اولایلاردا دا داها بیزیم تحلیل لریمیزه گووه نمز.
یا او زامان کی بیزیم بیر تبریزلی دوستوموز اؤنری وئریر کی بیز گرک خیابانلارا توکولوب و موسوی نی دستکلی یک ، او دا میللی حرکت آدینا. و بیلمیر و یا ایسته میر بیلسین کی بیز بئله بیر یارارسیز مسئله ده هزینه وئرمه مه لی ییک.
البتده میللی حرکتیمیزین اکثریتی بو ساحه ده دوزگون استراتژی ایله حرکت ائتدی و اولای لاردان خبرسیز قالمایاراق ، گؤستری لردن اوزاق دوروب و ساده جه سؤزده غئیر دئموکراتیک حرکت لره اعتیراض ائتمک ایله یولوموزو بلیرله دی. هر حالدا معروف و تانینمیش فعال لاریمیزین دا یالنیش حرکت لری ، حرکتین آدینا یازیلیر.
یازار یئنه اعتیراف ائدیر کی تحریم سیلاحیمیز چوخ یارارلی اولا بیلردی ، آما تاسسوف لا بیز ائیلیه بیلمه دیک میللتیمیزی راضی ائدک بو سیلاحی ایشلتسین و بو اولای دا ، ایران حاکئمییتی قازاندی و میللتی – هر یول ایله اولمالیدیر - صاندیق باشینا چکدی. و مییلت چوخلی فایزدا سئچیم لرده شیرکت ائتدی و بو دا یالنیز و یالنیز حاکئمییتین نفعینه قورتولدو و نیظاما بیر بویوک مشروعییت قازاندیردی.
ایندیسه دونیادا کی ایرانین علیهینه باسقی لارین قارشیسیندا بو مشروعییت وئرمک ، نیظاما چوخ یارارلی اولاجاق. تاسسوف لا بیزیم بیر سیرا دوستلاریمیز یئنه تحلیل لرین ده موسوی یه سس وئرمگی ، تایید ائدیب و اونو ، احمدی نیژادا یوخ اولاراق، دیرلندیریرلر. یعنی یئنه ایستمیرلرکی یالنیشلیق لاری نی بویونلارینا آلسینلار. بیز نه هزینه ایله احمدی نئژادا یوخ دئییریک؟! نیظام و خامئنه ای یه مشروعیت قازاناراق؟! بیزیم آیدین فیکیریمیز بئله بیر فیکیره صاحیب اولسا، گرک اوتوروب بیر دولو قارین اؤزوموزه و بئله بیر آیدین فیکیریمیزین حالینا آغلامالی ییق. بیر آیدین فیکیر اویونا گلمز ، بلکی اؤزو اویون یارالدار.
اسماعيل نوری علا جنابلاری «آيندهء اصلاح طلبان و نقش مهندس موسوی» مقالیه سینده بو مسئله یه گوزل جه سینه باخیب و دئدییب:
... بعبارت ديگر، از پيش کاملاً روشن بود که هر رأی افکنده شده در صندوق به معنی کوشش برای انتخاب رئيس جمهور نيست و نخست به معنی تجديد بيعت با ولايت فقيه و قانون اساسی جمهوری (؟!) اسلامی و نظارت استصوابی شورای نگهبان آن محسوب می شود و، سپس، رأئی است برای کسی است از ميان منتخبين شورای نگهبان که رآی دهنده نامش را بروی ورقهء رأی نوشته است. بنا بر اين، اکنون هم هرگونه اعتراض گسترده به نتايج انتخابات، و تقلب دولت پادگانی در آن، اين «واقعيت» را منتفی نمی کند که براستی ۴۱ ميليون ايرانی، با ارادهء شخصی، بدون زور و اجبار و به طيب خاطر، صبح جمعه ۲۲ خرداد از خانه بيرون آمده، به حوزه های اخذ رأی رفته، شناسنامه و کارت ملی خود را داوطلبانه در اختيار مأموران وزارت کشور دولت پادگانی قرار داده، و با خوشحالی و افتخار تمام انگشت خود به مرکب ممهور کرده و آن را برخ تمام دوربين های جهان کشانده اند. شرکت در انتخابات، شرکت در يک سری مفروضات و روندها است که تنها انتهای آن به دادن رأی به نام يک کانديدای دست چين شده می انجامد. مخالفان بايکوت انتخابات مجدانه کوشيدند تا مردم در اين «بيعت گيری» شرکت نکنند و در کارشان موفق نشدند. ...
بو آرادا تاسسوف لانمالی مسئله بودور کی ، نوری علا کیمین آداملار بو مسئله نی آنلاییب لار ، آما بیزیم آیدین فیکیرلریمیز ، هله بو مسئله نی دوشونه بیلمی ییبلر.
بیر باشقا عزیز دوستوموز سارای گئرمیلی آدی ایلا «ایران در انتظار انقلاب تبریز» مقاله سینی یازیب و بویورور:
انتخابات دهم ریاست جمهوری در ایران، شرایطی فراهم کرد که به عقیده اکثر تحلیلگران مسائل سیاسی اگر اهمیتی مانند انقلابهای مشروطه و اسلامی نداشته باشد، اهمتی کمتر از آن ندارد. میتوان گفت اولین جنبش آزادیخواهی است که نقش روحانیت در آن کم رنگ شده است.
بو سؤزلر اساسدان یالنیش دیرلار. بو اعتیراض لار هارا و او ایکی اینقیلاب هارا؟! بو مسئله ده کیم دئییر موللالارین نقشی آزالیب؟! اعتیراض چی ایکی آدای دان بیریسی موللادیر. او بیریسی نین ده آرخاسیندا دوران یئنه موللادیر. بو اویونلاری قورانلار موللادیرلار و یونلندیرنلرده موللادیرلار. نه زامان موللالارین نقشی آزالدی؟
بو یازار مقاله نین آردیندا یازیبلار:
...جریانی که به نوعی منصوب به یک آذربایجانی است در تهران بر علیه ظلم مبارزه می کند و این یعنی پیونده تهران و تبریز...
اینسان گرک یا چوخ ساده لوح اولسون و بئله بیر ایستیدلالی اولسون و یا اصلن میللی حرکته اینانجی اولماسین. یوخسا موسوی نین دوغوم یوردو آذربایجان اولماسی اونو ، آذربایجانلی ائتمز ، ها بئله اونو آذربایجانلی لارا اؤندر ده ائتمز. اگر ائله اولسایدی اوندان بویوک خامئنه ای دیر ، ائله او دا موسوی کیمین خامئنه لی دیر. بو خامئنه ای نی آذربایجانلی ائدر؟! بیر آدام کی تبریز ده تورکی دانیشماق اوچون تمرین ائدیر ، بیزه آذربایجانلی و آذربایجانلیا لیدر اولا بیلر؟!
یازار بویورورلار:
...از طرفی اکثر خواسته ها و مطالبات حرکت ملی نیز در چهارچوب قانون اساسی می باشد. ...
یوخ دوستوم سیزین بو سؤزوز نئچه ایل بوندان اؤنجه نین فیکری ایدی. داها طلب لر و ایستک لر آرتیب و ایندیسه یالنیز آنادیلی طلبیمیز اودا یاریاریمچیلیق ، ایرانین آنایاسا سی ایلا آلینمالی دیر. بیزیم ان موهوم ایستکیمیز ، اؤز میللی موقددراتیمیزی و سرنوشتیمیزی اؤزوموز تعیین ائتمک دیر و بو دا ، ایرانین آنایاسا سی ایلا بیر یئره ییغیشان مسئله دئییل. سیزین ایندیسه بو سؤزونوز ، میللی حرکتین اؤنونده بیر بویوک مانیع یارتماق معناسیندادیر.
یاشاسین آذربایجان
یاشاسین آذربایجان اوچون چالیشانلار
قوراپیشیرن (تیر) آیین اون یئددیسی – آذتورک (www.azturk.blogfa.com)
