ایراندا تورکجه آدلار دهشت منبعی اولوبدور
 میللی حرکت یکشنبه ۱۱ بهمن ۱۳۸۸: ایراندا تورکجه شخص آدی، قزئت آدی، ائکولوژی، یاخود سوسیال یؤنوملو NGO آدی حاکمیتین گؤزچولرینی واهیمهیه سالیر. اگر وطنداش یئنی دوغولموش کؤرپهسینه تورک آدی قویسا، یاخود بیر یازار اؤزونه تورکجه تخلص گؤتورسه - بو، دهشتلی میللتچیلیگین، حتی پانتورکیزمین علامتی کیمی گؤرولور. مسئلن، "آزادلیق" رادیوسونون خبرینده دئییلیر: "10 گوندور طبیعتی محافظه ایله باغلی یاراتدیغیمیز "داغ" قروپونون ایشینی قاداغان ائدیبلر. حاقیمیزدا محکمه حؤکم چیخاریب. حؤکمده یازیلیب کی، "داغ" قروپو میللتچیلیگی یایماقلا مشغولدور". بو سؤزلری آزربایجانین قوشاچای شهر ساکینی بهبود قولوزاده سؤیلهییب. اونون سؤزلرینه گؤره، سون گونلر قوشاچایدا رسمی قوروملارین تعقیبلری باشلاییب. آذربایجانلیلار هئچ بیر سبب گؤستریلمهدن حقوق-محافظه اورقانلارینا چاغیریلاراق، سورغو-سوال ائدیلیر.
بئهبود قولوزاده اوزون ایللردیر رسساملیقلا مشغول اولور. او دئییب کی، چکدیگی رسم اثرلرینه "باخیش" ایمضاسی قویدوغونا گؤره رسمی قوروملار بارهسینده جینایت ایشی آچیب و بیلدیریبلر کی، "باخیش" تورک سؤزو اولدوغو اوچون بو رسملرده میللتچیلیگی گوجلندیرمک مقصدی گودولور (!؟).
بیر مدت اؤنجه اردبیل ایالتینین گئرمی رایونوندا صاحیبکارلار دوکانلارینا تورکجه آدلار قویماق جسارتینده بولوندوقلاری اوچون یئرلی اینقیلاب محکمهسینه چاغیریلمیشدی. "چنلی بئل" آدلی ماغازانین ییهسی شهروز اسدی یه محکمهدن دئییبلر کی، بو آدی قویماقلا او، "ایران دؤولتچیلیگینه قارشی فعالیت گؤستریر" (!؟) و دوکانین آدینی دییشمهلیدیر. اطلاعات امکداشلاری اونون دوکانینین قارشیسینداکی تورکجه رئکلام لؤوههلرینی سؤکهرک، اؤزونو قورومون تجریدخاناسیندا ساخلاییب، سورغو-سوالا توتموشدولار.
خبرلره اساساً، "آنا"، "ایلقار"، "ساری تئل"، "آیاتای"، "تورک" کیمی آدلار قویولموش تیجارت اوبیئکتلری و موسیسهلرین آدلاری آرتیق دییشدیریلیب.
آذربایجانلی ایش آداملاری شیرکت و دوکانلارینا تورکجه آد قویدوقلاری اوچون اؤتن ایل ده محکمهیه جلب اولونموشدولار. بیر ایل عرضینده بونونلا باغلی مینه یاخین "جینایت ایشی" آچیلیب. تورک آدی سئچن ایش یئرلرینه مکتوبلا خبردارلیق ائدیلیر، بونا عمل ائتمهینلره محکمهنین قرارینی گؤندریردیلر. همین مکتوبلاردا دوکان و شیرکت ییهلریندن آدلارین تورک دیلیندن فارجایا چئوریلمهسی طلب اولونور. صاحیبکارلارین چوخو بو قراری ایجرا ائتسه ده، 50 ماغازا ییهسی حاکمیتین طلبینه بویون ایمهییب. بونا گؤره همین شخصلررین دوکانلاری و شیرکتلری قاپادیلیب. باخ، ایرانین تعریفلی ایسلام رئژیمینین رفتار و داورانیشی بئلهدیر.
تورکمنجه ده اولماز!
بو کیمی رفتارلا ایرانین شرقینده یاشایان تورکمن قارداشلاریمیز دا اوزلشیر. تورکمنصحرا آزادلیق تشکیلاتینین یایدیغی معلوماتا اساساً، ایرانین مدنیت و ایسلام ایرشاد ناظرلیگی تورکمنصحراداکی 590 دوکانین ییهسینه خبردارلیق مکتوبو گؤندرهرک، ماغازالارینا قویدوقلاری تورکجه آدلارین فارس دیلینه چئوریلمهسینی طلب ائدیبلر. اوزون سورن چک-چئویردن سونرا 530 دوکان صاحبی تورکجه آدلاری دییشمهیه مجبور اولوب. تورکجه آدلارلا یاناشی، حاکمیت بو دیلده چیخان تک-توک کیو-لره ده باسقیلارینی آرتیریب.
تورکجه طلبه قزئتلری تسونامی دالغاسیندا
"گونازتی وی"نین معلوماتینا گؤره، گونئی آزربایجانین بیر سیرا بؤلگهلرینه بونونلا باغلی گؤستریش وئریلیب. همین گؤستریشه گؤره، آذربایجان تورکجهسینده چیخان هر قزئتدن بیر نوسخه ایالتین ایجرا حاکمیتینه گؤندریلسین. همین قزئتین فعالیتینی داوام ائتدیرمهسی اوچون ایجرا حاکمیتینین دفترخاناسیندان جاواب گؤزلنیلسین. آذربایجانلی طلبه-گنجلرین آذربایجان تورکلرینین تاریخی، دیلی و ادبیاتیندان یازان "اولوس"، "نسیم"، "آراز"، "اؤزلوک"، "اویانیش"، "ستارخان"، "کیملیک"، "یولداش"، "یاغیش"، "قیپچاق"، "گونش"، "یارپاق"، "تئلنگر"، "چنلی بئل"، "یاشیل یول"، "آنا یوردو"، "سحر"، "آچیق سؤز" و "سایان" آدلی طلبه درگیلری قاپادیلان تورک دیللی مطبوعات اورقانلاردان یالنیز بعضیلریدیر.
خاصیرلاداق کی، اؤتن ایل یزد اونیوئرسیتئتینین آذربایجانلی، او جملهدن خلج، آوشار، قاشقای تورک طلبهلرینین بیرگه بوراخدیغی "خلج" آدلی طلبه درگیسینین نشرینی اونیوئرسیتئت رهبرلیگینین مدنیت ایدارهسی یاساقلامیشدی. عالی تحصیل اوجاغینین رهبرلیگی بونو درگینین "پانتورکچولوگو و بؤلوجولوگو" تبلیغ ائتمهسی ایله اساسلاندیریب. ایکی سایی ایشیق اوزو گؤرموش "خلج"این سونونجو ساییندا گونئی آذربایجان تورکلرینین دیلی، مدنیتی و تاریخی حاقدا یازیلارلا یاناشی، "مشروطه حرکاتی"، "ایرقچیلیک و آریچیلیک"، "هیندیستاندا قورولموش خلج-بابور ایمپئریاسی" و دوکتور جاواد هئیتین "21 آذر - آذربایجانا قارشی مدنی سویقیریم گونو" آدلی مقالهلر چاپ اولونوبموش.
یاییلان خبرلره گؤره، بیر مدت اؤنجه درگینین باش رئداکتورو ناملوم شخصلر طرفیندن "بؤلوجو" اتهامینا مروز قویولاراق هدلنمیش، اونون نظارت ائتدیگی سایت ایسه باغلانمیشدی. یزد اونیوئرسیتئتی مدنی مسئلهلر کومیتهسینین مسئوللاری "خلج"این نمایندهلری ایله گؤروشده دئییبلر: "اگر تورک طلبهلر اونیوئرسیتئتده پوزوجولوق فعالیتی ایله مشغول اولماسا، او زامان سیزینله هئچ بیر پروبلئمیمیز اولمایاجاق".
اونو دا خاطیرلاتماق لازیمدیر کی، بو آلی تحصیل اوجاغیندا یاییلان "آنا یوردو"نون 11، "ایشیلای"این ایسه 4 سایی ایشیق اوزو گؤردوکدن سونرا قاپادیلیب.
آینا قزئتیاؤیرنجی |
|
Donbale
Balatarin
Facebook
