ميلي ساووناریمیز ؛ صفرخان قهرمانیان وفاتی نین 6 جی ایل دونومو ایچین

میللی حرکت پنجشنبه ۱۶ آبان ۱۳۸۷:

آبان آيي­نين 17- سي، آذربايجانين بؤيوک فدایی اوغلو، ظولم آلتيندا یاشایان ميلتلر اولگوسو، اولوسلار آراسي آپارتايدلا دیرنیش سيمگه ­سي، ميلي ساوونار "صفرخان قهرمانيان"ين حياتدان کؤچمه ­سي ايله برابردير. هر ميلتين تاريخينده چوخ آز قهرمانلار تاپیلار کي اونلارين آدي و ساني یالنیز آنايوردلاريندا یوخ بلکه بوتون دونيايا سس سالميش اولسون.شک سيز قهرمانلار، تاريخين ان چتين چاغلاریندا يوزمينلر اینسانین ايچيندن سئچيلن  ان ايراده­لي و تدبيرلی شخصلردیرلر.

تاريخ بويو آذربايجان اؤلکه­سي اؤز قوجاغيندا بوتون دونيايا اولگو و سيمگه اولان چوخلو ايگيد ارنلر و قادينلار بسلدیبدیر.بو آرادا عؤمرونون اَن ده یرلی چاغلاريندان 32 ايلين ظاليم پهلوي­لرين دوستاقلاريندا کئچيرن، دونيانين ان چوخ سياسی تورمه سینده قالان موباریزی "صفرخان قهرمانيان"ين آدي ، يقين کي آذربايجان و دونيا تاريخينده ان سيلينمز آدلارداندير.صفرخان آذربایجان میللتینین پهلوانی کیمی،بير زاماندا ياشاييردي کي او چاغدا آذربايجان قهرمانلاري یوخسوللوق وعدالت سیزلیگه قارشی،اؤز هويت و کيمليکلريني قوروماق اوچون وپ هلوي شوونيسم رژيمي­نين بايراغيني يئنديرمکدن اوترو قیام ائدیب و هابئله "بير ديل، بيرميلت، بير دؤولت" قاليبينده موهوم  و یالان آريايي ميلتي يارادان ايستعمار جوجوقلاري الي ايله ايلک اينسانلیق حاقلاري ازيلن ايراندا ياشايان بوتون قوملار و ميلتلرين قورتولوشو و آزادليغی  اوچون آياغا قالخديلار.

صفرخان آذربايجان ميلي حرکتي­نين جاندان کئچن عسگري دير. او آريايي ظاليملرين ايللر بويو دوستاغيندان سونرا، 1357- جي ايلده ابان آینین اوچونده ،آزادليق سئور يوزمين نفرلر ايستيقبالي ايچينده آپارتايد دخمه­لريندن قورتولدو و بئله­ليکله اودلار يوردو آذربايجانا یوخ، بلکه بوتون موباريز ميلت­لرين دايانيش، غئيرت و اؤلومسوزلوک سیمبولو اولدو. صفرخان و اونون آرخاداشلاري و هابئله «احمد برادران» و «مجيد امین مؤيد» کيمي پولاد ايراده­لي و موقاويم دوستاق يولداشلاري، شک سيز 20 ایله یاخین نفرتلی آپارتاید حبسینه دوزرک ،اوز دايانيش گوجلري­نين دوشونجه­ تمللرینی، آذربایجان مدنیت و کولتورونده اولان گوجدن و هابئله شرق ميلت­لرين تايسيز ارني، آذربايجان دموکرات فرقه­سي­نين باشقاني،شهيد سيد جعفر پيشه­وري­نين موباريزه مکتبي­نين اوصوللاريندان آلیبدیرلار.

صفرخان و اونون ايگيد آرخاداشلاري قادیر اولدولار تايسيز دايانيشلاري ايله ايرانين بوتون ظولم آلتيندا اولان ميلت­لرينین غضب وولقانيني، پهلوي آپارتايدين ييخيلماسينا دک یوخ ، بلکه بو گونه قدر ياشاتسينلار. تاسوفله اؤلکه­ميزين تاريخينده اولان بو اؤنملي بؤلوم، دربار تاريخچي­لر طرفيندن چوخلو ظولم و غرضلره معروض قاليبدير. پهلوي کودتا رژيمي، آمئريکا، بريتانيا و شوروي ايستعمارچی دؤولتلرينین حيمايه و توافوقو ايله، 21 آذر 1325 ده اؤلکه­ده دموکراسي اوصوللاريني يئرينه سالماغا چاليشان آذربايجان ميلتينه وحشی­جه آخين ائتدي و قلمه گلمز ايگرنج و قورخونج بير سوي­قيريم آذربايجان تورکلرينه قارشي يولا سالدي. بو سويچولوق آخيني، داشناک ائرمني­لرين آذربايجان موسلمانلارينا قارشي دفعه­لرجه ايشله­ تديکلري قانلي جينايت سيراسيندا، موسلماً 20- جي يوز ايلين اَن چيرکين سوي قيريملاريندان سانیلمالیدیر.

سندلر و شاهيدلرين شهادتي ايله بو وحشي­جه سوي­قيريمدا 10 مينلر آزادليق سئور آذربايجانلي بؤلوجو، کومونيست و پان تورکيست آدي ايله موحاکيمه­سيز ائولر ایچینده و خيابان قيراقلاريندا منحوس پهلوي رژيمينه باغلي قاتيل­لر طرفيندن اَن قورخونج شکيلده شهيد اولدولار. هابئله 100 مينلر آذربايجانلي موختليف شهر و کندلرده(تئراندان ماکی یا دک) تورک اولماق و تورکجه دانيشماغا گؤره چوخلو ظولم، تجاووز و تالانا قوربان اولدو، ائله کي او اورک سيخان هفته­لرين خاطيره­لري هئچ واخت ميلتيميزين تاريخي حافيظه­سيندن سيلينمیه­جک و موطلق اونون عاميل­لرينه و ايندي کي ایگرنج مودافيع­لرينه باغيشلانماياجاقدیر.

بو نئچه هفته سوي­قيريمدا بيلي­يورد و مدرسه­لرده درس دئييلن تورکجه و يا بو ايالتده ياشايان آيري قوملارين ديللرينده اولان يوز مينلر ساي کيتاب،پان آريانيست­لرين کينه­ لی اودوندا يانديریلدی.بئله­ليکله آذربايجانليلار ايلک اينساني دوغال حاقلاريندان محروم ائديلديلر، ائله کي اؤزلريني تورک آدلاندیرماقدان و مينلر ايل ياشاديقلاري توپراغا آذربايجان دئمکدن یاساقلاندیلار. قولدوررضاخانين غئيرفارس قوميت و ميلتلري ازمک چیرکین سياستي­نين آرديندا،آذربايجاندا چوخلو شهر، کند و يئر آدلاري فارسجايا و تاتجایا چئوريلديريلدي و يا بنزتيلدی. عزيز آذربايجان پان آريايي­لرين تيغي آلتينا کئچدي و دورلو آدلارلا اونو (ظاهيراٌ) پارچا لادیلار  کي تاسوفله بو سياستين آردي ايسلامي اينقيلابدان سونرا هله ده وار!

پهلوي رژيمينين ايشغالچي وغاصیب اوردوسونون گوستردیکلری وحشي­ليکلر، آذربايجانين دوشونجه­لي موباريزلرينین بيرليک اوجاغيندا چالیشان رحمتليک صفرخان، شهيدفريدون ابراهيمي، شهيد سريه خانيم، شهيد نورالله خان يکاني، شهيد ميرزا ربيع الله کبيري، شهيد آيت الله خوئيني زنجاني، شهيد ايوب کلانتري، شهيد محمد امين آزاد وطن، شهيد احمد جودت، شهيد محمد باقر نيکنام، شهيد علي فطرت، شهدي محمد علي رامتين، شهيد سعيد يوزبندي، شهيد ايمانعلي آقا علي اوغلي، شهيد شيخ پولاد احمدي، سلام الله جاويد، جعفر کاویانی،رضا الهامی،حاج علي شبستري، محمد تقي زهتابي، آشيق حسين جاوان، آشيق قشم، حبيب ساهر، شهید صمد بهرنگی،بولوت قاراچورلو(سهند)، محمدبي­ريا، علي کمالي، گنجعلي صباحي، صمد صباحي، حسينقلي کاتبي، احمد برادران، علي تبريزلي و ... کيمي­لرين ايگيدليک و قهرمانليقلاري­نين قاباغيني آلا بيلمه­دي ائله کي حرکت ييخيلمادان گوجلو شکيلده بو گونه يئتيريليب و يقين کي سونسوزادک قاباغا گئده­جکدیر. هابئله بو يولدا چوخلو تورک اولمايان آذربايجانلي مثلا شهيد قاضي محمد(کورد)، شهيد دانيل يوشيعا(آسوري) ،شهید آرسین شاخیان(ائرمنی و ضیدی داشناک) و...­ کيمي­لردن آد آپارماق اولار کي آذربايجانين يوکسک هدفلري يولوندا جانلاريني باغيشلادي.

ميلي ساووناریمیز صفرخان وفاتینین ايکينجي ايل دؤنومو  توره نینده 15/8/1383اوخونان بیلدیرینینی ایلک پارچاسی